فتحت لي مدونة جديدة الووردبريس راح أكون هناك كثير
https://wejj10.wordpress.com/
عدت من جديد.
ورجعت من جديد للمدونتي ، ومع الرجعه غيرت قالب مدونتي عشان اتحمس اكتب اكثر ..
والحمدلله الذي بنعمته تتم الصالحات وبكذا خلصت "الثانوية والقدرات والتحصيلي".
أعتبر أني قطعت جزء كبير من دراستي ومتحمسة للقادم ، سنة ٢٠١٥ ماكانت أبد حافلة بالأنجازت مجرد أنجزت فيها من ناحية دراستي أخذت الثانوية صيفي وتخرجت الترم الأول عشان الترم الثاني أستعد نفسياً للجامعه وأتهيأ للتطوير لغتي الانجليزية .
بالبوست الجاي بتكلم عن إستعدادي للتعلم اللغة .
أحسني ماني عارفه اعبر ، مستحية "فقدت مرونتي بالكتابة للأسف" لكن بستعيدها ان شالله مع الأيام .
دمتم بود.
أسلوب الاستمرار بالحياة .. القناعة !!
مساء القناعة / صباح الأشياء الجميله
كيف حالكم ؟
بعد انقطاع طويل عن مدونتي الجميلة بسبب دراستي ـ الله يجعل ختامها مسكَ ـ
رجعت لكم بعد غيبة طالت سنه أو كم شهر ما أفتكر للأسف ، ورجعت لكم بثرثرة وفلسفة متواضعه بموضوع مثير اهتمامي بهاليومين اللي هو (القناعة) .
للأسف أندفنت القناعة عند البعض بعد ماصار كل شئ أمام الكل عبر السوشال ميديا صرنا نطالع اللي فوقنا وشف وش سوا وليه احنا ما نصير مثلهم ؟ أبوي ليه ما يسفرنا مثلهم و و و .... ماتنتهي!
بقلكم شئ من والواقع انصدم احيانا لما أكون بجانب اي شخص كان ويقول :الله يل*** متى مابغت تسافر تسافر وأنا (وتمد اصابعها وتصكها بوجها) لو أتمنى حليب بقر ما جاني :) ؟
يضحك ويبكي بنفس الوقت ! ماتدري تصك وجهك مع هالشخص على غباه ولا تفهمه ان حياتك حتى أنتِ جميله وأنه هذا الظاهر من حياتهم فقط ماتدرين اش عندها مسافره ؟ وش أخذ ربي منها وعطاك .
رؤيتك للأخرين بمنظار وترقبك لأدق تفاصيل حياتهم يجعل منك شخص زائد بالحياة لا أكثر .
تبين تصيرين مثلها ؟ أدعِ ربك أشتغلي على نفسك ، أوصلي للي وصلته ، أؤمني بقدراتك ثقي بنفسك أصبري وتحملي بتوصلي مثلهم .
"وتذكري القادم أجمل تلك قناعه .. تسعدني "
مليت من حياتي كيف اصير سعيدة ؟
رددي دائماً : ( اللَّهم إرزِقني الرِّضى بِما قسَّمته لِي )
ماأجمل القناعه عندما تنظرين للحياتك بنظرة جميله بنظرة تأمل و بأن القادم أجمل .
"الحمدلله أني بعافيتي ، الحمدلله أن هناك بيت يؤويني الحمدلله أن أهلي حولي .. الخ من نعم ربي أعطاك هي وحرمها من غيرك"
المشاعر الملخبطة اللي تجيك بحالة ضعف أبعديها عنك تذكري ربي , وارضي باللي قاسمه لك وأشتغلي على نفسك بهواياتك بأي شئ يخطر على بالك ..
القناعة والغنى ..
الغنى غنى الروح ، مو كل شئ يعرض لك يمكن يكون الصحيح ؟ الناس تمر بحالات اكتئاب وطفش هي بس توثق أوقاتها الحلوه زي ما أنتي أوقات تصوري وقتك الحلو .
وقد سُئلت الصِّدِّيقة عن عيش رسول الله صلى الله عليه وسلم، فذكرت أنه يمرُّ الهلال والهلالان على بيتِ رسول الله صلى الله عليه وسلم لا يوقَدُ فيه نار، وَقُوتُهُم الأسودانِ؛ التمر والماء، وكان رسولنا الكريم صلى الله عليه وسلم ينام على حصير حتى يؤثر في جنبه، ويرى أنه في نعمة كبرى، ومنة عظمى، تستوجب منه شكرها، والقيام بحقها، بل كان صلى الله عليه وسلم يقوم الليل حتى تتفطَّر قدماه، ويقول: ((أفلا أكون عبدًا شكورًا؟!)).
سبحان الله أما نحن حدث ولا حرج !
أنا ابعد تماماً عن المثالية انا بشر مثلكم يخطأ ويصيب ، وأتعلم من أخطائي، أوقات أمر بلحظة ضعف أكون عندي فيض من المشاعر وأطالع وأغبطهم!! بس يعني شئ لحظي ويروح أرجع أمارس هواياتي ولحظة حلوه تمر ولحظه مو حلوه تمر ...
و مو شرط كل غني سعيد وكل فقير حزين والعكس ، الحياة بسيطة ما نحتاج نكبرها .
نهاية :
عيشوا بسعاده وأمان و سلام الداخلي
طبتم بود
كيف أستعد للإختبارات النهائية | Wejdansa
أهلن أهلن ، وحشتوني :(
قبل كل حاجة أنا اسفه على ردائة الصورة :p، لي فترة وأنا اعدل عليها بس ماش ..
اليوم موضوعي بمناسبة أن الاختبارات النهائية قربت وكيفيفة الاستعداد لها ؟
كلنا نبي النسبة الزينة واللي تشرف وفي مثل يقول " كن أو لا تكن" بما أننا في عصر القوي الي الواحد تنفعه شهادته وعلمه في يبلنا نجتهد على أنفسنا ، هو صعب ؟ لان الملهيات صارت بيدينا وأقرب شئ الجوال ، والجوال البرامج اللي فيه تلهي وأولها السناب بالنسبة لي ..
يعني السناب صار ياخذ وقتي كثيير، تقريباً ١٣ د تروح من وقتي وأحيانا توصل لساعه ؟ خير :)
المهم مو هرجتنا هذي ، هرجتنا كيف أجيب النسبة العالية وأفرح أهلي فيها ونفسي أولاً ..
أكبر خطأ أنو تذاكري بليلة الاختبار ؟ منهج تآخذيه شهر تذاكريه بوقت الاختبار أحلمي تجيب الدرجة الكاملة فيه.
لانو شئ صعب للمواد الأحياء والرياضيات والمواد العلمية .
قبل كل شئ خلي ثقتك بربي قوية وحبي المادة ؟ لاتكرهي اي مادة تعرفي عليها وغوصي فيها ..
بفصلكم الحين المواد وصعوبتها :
نجي للرياضيات
< حبي الرياضيات لان أغلب الدرجات فيه هو اللي يرفعك وهو اللي يخسفك بنفس الوقت .
الرياضيات يبي للمراجعه من 5-6 أيام ودفتر أبو ١٠٠ تلخصي كل القوانين وتمرني نفسك على الأمثله مو لازم تتعمقي وتحلي أشياء كثيره أفهمي ومرني نفسك على كم سؤال .
إذا استصعب عليك شئ ابحثي بالنت وغير كذا صلي لك ركعتين .
الفيزياء :
نفسه نفس الرياضيات بس بالنسبة لي ياخذ مني ٣-٤ أيام بما أنه ابلته تدينا ملخصات ونسخ ولصق منها فما يحتاج لي غير تركيز < بناكلها بالتحصيلي :(
مواد الدين بصفه عامة :
يبيلها من ٢-٣ ايام تركيز وفهم ، وبالنهاية هي من واقع الحياة فتسهل ..
E :
ماحد جايب لي العقدة النفسيه الا هو ، طبينا بأبلات في الثانوي يبونك جون .
يقولون انتم من المتوسط تدرسون E وللحين ماعرفتم ؟ مادروا ان ماش تأسيس ما غير A B
لما كنت بأولى بديت اطور لغتي وبديت أحسنها لانو من جد "الأمي بزمننا مو اللي ما يعرف يقرا اللي ما يعرف English"
فمذاكرة الE تختلف على حسب اتقانك لها اعرف بنات ماشاء الله مايذاكرون له 100٪
انا ياخذ مني من 2-3 أيام ، بتلخيص الفوكابلري والقرامر ،
بقي لنا الأحياء:) :
لسهولة هالمادة الا انها تحشر ومعلوماتها جداً دسمة ، لو بتذاكرها بليلة ما تخلصها الا الصبح من المعلومات المتشابهة والكلام الكثير وتعتمد على الفهم أكثر شئ .
٤-٣ أيام ..
بالنهاية ما ياخذ منك المراجعه كل الدروس اسبوعين بالأقل للتجيب درجة عالية ، وبقي لنا 40 بالتمام للأجازه الصيفيه
ترتاح اليوم تتعب بكرآ والعكس ، مانبي نتحسر في كل مرة ياليتني اجتهدت و لبلبلااه
أبدا من الحين لا تقول بكرا ..
بالنهاية ;
الله يوفقكم أجمعين واللي كتبته فوق مجرد فكرة وأنت وإجتهادك وتوزيعك للمذاكرة ،
الكلمة الطيبة .
السلام عليكم ورحمة الله وبركاته
كيف حالكَم يا مدلّلين ؟
شرايكم بالصورة ماخرج منها برد ؟
وأجوائنا صايره جميلة باريسية بس صحراوية :p
اعرف مادري اش دخل الكلام اللي بقوله بالصورة !
تعالو بقلكم على شئ فاقدينه هالأيام وهو ;
تعالو بقلكم على شئ فاقدينه هالأيام وهو ;
الكلمة الطيبة
الكلام الجميل له دور لتغيير نفسيتك كيف ؟
تعالَ أديكَ مثالين ;
يوم عصيب بمعنى الكلمة توكَ مخلصة من المشروع الكبير اللي سويته
ويجيك شخص يقولك ؟ والله لو أنك كبرت خط الجملة الفلانية كان أفضل ولا أشبو شكلك مبهذل ، ماألقيتِ زين، لو أنك رفعت صوتك شويّ ؟
أو
شخص يجيك بإبتسامه جميلة ويقولك ؟ مشروع بطل تستحقين الدرجة والنجاح ، ماشاء الله عملك جميل ..
كلنا نفضل الشخص الثاني اللي يجي برحابة صدر ويقلك كلمة جميلة تغير لك يومك والتعب اللي تعبتي عليه .
أما الأول من الغبنة ودكِ تحطيه بخلاط وتفرمينه وهو وكل شخص محبط ويذب ذبات مالها داعي .
فالكلام الجميل له دور كبير بتغير نفسيتك للأحسن
نتعود نقول كلام جميل للبعض مالو داعي نقول أشياء سلبية ولما نجي نصحه بأدب وذوق وبالكلمة الطيبة
زي مايقول ربنا ":- (( وقولوا للناس حسناً ))"
" الكلمة الطيبة هي دائما تطرب السامع "
ومفعولها سريع ، جربي ؟ التفتي ودوري اي احد قريب منك قولي له كلمة جميلة ؟ أحبك،الله يخليك لي و....
شايفه كيف بيبتسم ، او حتى لو ماأبتسم بيتأثر اللي بداخله وبيصير ألفه ومحبة .
يله نغير بأنفسنا ونصير نستبدل الكلام الموجع بكلام الجميل .
قبل ما أخلص تدوينتي الخفيفه..
أحب أشكر أميره على هديتها الجميلة ، شكراً يا جميلة فرحتيني ()"
وماانسى حبيبتي روان أشكرك من القلب على نشر مدونتي $:،" واحشني يا وحش"
الله يخليكم ليا .
وشكراً لكِ أنتي -ياللي تقرين-.
رحلة صباحية - moring on beach
مساء الخير .
اليوم ماعند كلام كثير أكتبه :p .
حَبيت اشاركم يوم من الايام اللي أحب اوثقها .
رحلة صباحية خفيفه ..
تعلم الشئ ببساطة .
السلام عليكم ورحمة الله وبركاته
اليوم جبت لكم مقطع بسيط وخفيف .
يتكلم أنك تستطيع أن تتعلم أي شئ تبيه فقط ب ٢٠ ساعه ؟
يالله كيف أتعلم اي شئ ابيه ب٢٠ ساعه ؟ لا شئ مستحيل
المستحيل ولَ زمانه ،
كل اللي عليك ان تحط نص ساعه بس كل يوم او ساعة لتعلم أي شئ خلال ٢٠ ساعة.
هو يحكي عن تجربته بعزف القيتار ، على أنه متزوج وعنده بنت .
أنا لما اشوف اي احد يتزوج ويجيب عيال احس خلاص الدنيا قفلت بوجهه !!
ليه ؟ يعني ماعد يقدر يفضى لنفسه - مسؤلية وو ..
أوكي مسؤلية بس مو لدرجة أنو أنسى نفسي ما اطورها ؟
جميل المقطع ، وفي كتاب بنفس العنوان ماقريته لكن مع الأيام اقراه واقولكم ..
أتمنى يفيدكم ويغير فيكم أشياء مثلي
الاشتراك في:
الرسائل
(
Atom
)
